Грекиядағы теміржол компаниясы кеңсесінде болған жарылыс жауапкершілігін кім мойнына алды

АСТАНА. KAZINFORM – Афиныда жұмыс істейтін және 2019 жылдың қарашасында жүргізілген антитеррорлық операциядан кейін жойылды деп есептелетін грек содырларының Революциялық өзін-өзі қорғау ұйымы 11 сәуірде Hellenic Train кеңсесінің алдында болған жарылыс үшін жауапкершілікті мойнына алды, деп хабарлайды Еuronews.com. 

Үкіметке қарсы белгілі сайттағы жазбада Hellenic Train-ға шабуыл 2023 жылдың ақпанында Тембидегі адам өліміне әкелген пойыздың рельстен шығып кетуіне жауап ретінде жасалғаны және оны жасыру әрекеті екені түсіндірілді.

Декларация авторлары «Тембидегі қылмысты жасыру арқылы үкімет саяси жауапкершілікті өз мойнына алды» деп санайды.

Революциялық өзін-өзі қорғау ұйымы 2024 жылы Еңбек министрлігінің алдына қойылған бомба үшін жауапкершілікті де өз мойнына алып, екі шабуылды «Палестина халқына және оның қаһармандық қарсылығына» арнады. 

Грек полициясының сарапшылары жұма күні кешке Афиныдағы Hellenic Train кеңсесінің алдында жарылыс болғаннан кейін дәлелдер іздеп жатыр.

Қоғамдық пікір бойынша, бұл оқиғаның 2023 жылдың 28 ақпанында 57 адамның өмірін қиған Грекиядағы ең ауыр пойыз апатына қатысы бар.

Полицияның нақтылауынша, жарылыс алдында грек газетінің редакциясына ел астанасының көлік ең көп жүретін тасжолдардың бірінің маңында лаңкестік әрекет туралы ескерту түрінде анонимді қоңырау келіп түскен.

Жарылыс салдарынан ешкім зардап шеккен жоқ, ғимаратқа зақым келген жоқ.

Грекияның Efsyn газеті мен Zougla жаңалықтар сайтының хабарлауынша, жарылғыш зат нөмірі жоқ скутерге орнатылған шынжырлы құлпы бар рюкзакта жасырылған. 

Полицияның арнайы тобы жарылғыш затты іске қосқанға дейін залалсыздандыра алмады. ERT мемлекеттік телеарнасының мәліметінше, жақын маңдағы қонақүй эвакуацияланды.