ОРАЛ. KAZINFORM – Әлемдік теннистің басты жұлдыздарының бірі Стефанос Циципастың Алматы қаласында 11-19 қазанда өтетін Almaty Open ATP 250 турниріне келетіні ресми расталды.
Әлемнің бұрынғы 3-ракеткасы С.Циципас бұдан үш жыл бұрын Astana Open ATP 500 турнирінің финалына дейін жетіп, онда сербиялық Новак Джоковичке 3:6, 4:6 есебімен жол берген еді.
Енді грекиялық теннисші Almaty Open ATP 250 жарысының титулы үшін сынға түседі.
Циципастың есебінде жекелей сында 12 ATP титулы бар. Сондай-ақ Roland Garros (2021) және Australian Open (2023) додаларында финалға дейін жеткен.
2019 жылы ATP Finals турнирінің жеңімпазы атанды. АТР жарыстарында 300-ден астам жеңіске жеткен.
– Мен Қазақстанға қайта оралатын сәтті асыға күтемін. Мұнда тамаша жағдай жасалған, жылы қарсы алады, жанкүйерлер де қызу қолдайды. Алматыда кездескенше, - деді Стефанос Циципас.
Еске сала кетейік, бұдан бұрын Новак Джоковичтің Astana Open ATP 500 турнирінің жеңімпазы атанғанын жазған едік.
Сондай-ақ теннисші Даниил Медведевтің алғаш рет Алматы турнирінде өнер көрсететіні жазылды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).