Грузия парламенті «Шетелдік агент туралы» заңды соңғы оқылымда қабылдады

АСТАНА.KAZINFORM — Нормативтік құқықтық акт Грузия Әділет министрлігінің тізілімінде тіркеуден жалтарып, шетелден қаржыландырылатын заңды және жеке тұлғаларды қылмыстық жауапкершілікке тартуды көздейді, деп хабарлайды Kazinform.

Грузия парламенті үшінші және соңғы оқылымда америкалық FARA (Foreign Agents Registration Act) Заңының баламасы саналатын «Шетелдік агенттерді тіркеу актісі» Заңын қабылдады.

- Жаңа заңдағы қылмыстық қудалау туралы бап тіркеуден жалтарған ұйымдардың алдын алу шарасына айналады және олар миллиондаған доллардың қайдан келгенін, не үшін жұмсалып жатқанын халыққа түсіндіруі керек, — деді журналистерге парламенттің құқықтық мәселелер жөніндегі комитетінің төрағасы Арчил Гордуладзе.

Заңды қабылдауға 86 депутат дауыс берді. Ол Президент қол қойып, елдің Заң шығарушы органының сайтында жарияланғаннан кейін күшіне енеді.

Бұған дейін парламент спикері Шалва Папуашвили шетелден қаржыландырылатын 136-дан астам ҮЕҰ «Шетелдік ықпалдың ашықтығы туралы» заңға наразылық білдіріп жатқанын, ал 156-сы Әділет министрлігінде тіркеу рәсімін аяқтағанын мәлімдеген.

Ішкі қарсылықтар мен халықаралық сынға қарамастан, билеуші ​​«Грузин арманы» партиясы бұл заңның ашықтықты қамтамасыз ету және ұлттық егемендікті қорғау үшін қажет деп санайды.

Грузияда «Шетелдік ықпалдың ашықтығы туралы» заң 2024 жылдың 1 тамызында күшіне енді. Кірісінің 20%-дан астамын шетелден алатын үкіметтік емес ұйымдар мен БАҚ-ты Мемлекеттік тіркеудің ұлттық агенттігінде тіркеуге міндеттейді.

Бұған дейін Грузия парламенті 49 депутаттың өкілеттігін мерзімінен бұрын тоқтатқаны хабарланған болатын