Гүлшара Әбдіқалықова қуғын-сүргін құрбандары жерленген «Түйетөбеге» барды
Бүгін Ақтөбеде ашаршылық, қуғын-сүргін құрбандарын еске алу шарасы өтті. Мемлекеттік хатшы Гүлшара Әбдіқалықова саяси қуғын-сүргін құрбандары жерленген «Түйетөбе» ескерткішіне барды.
«Елбасы Нұрсұлтан Назарбаевтың «Әрбір жұрт тарихтан өзінше тағылым алады» деген сөзі бар. Біздің Тәуелсіздікке дейінгі тарихымызда халқымыздың тартқан қасіреті аз болмаған. Соның ең қасіретті тұсының бірі - арыстарымыз жаппай қуғын-сүргінге ұшыраған 1930-1950 жылдар. «Жұрт жеті ағайынды». Қынадай қырылған ашаршылықтың артында жұртты жаппай жазалау басталды. Халық саны күрт кеміген өткен ғасырдың 30-жылдары ұлтымыздың бетке ұстар зиялы қауымы кінәсіз атылды. Зұлмат жылдардың жаңғырығы халық жадынан өшпейді. Азаттық алып, егемен ел болғалы жақсылар мен жайсаңдарды түгендеп келеміз. Саяси қуғын-сүргін құрбандарын еске алуға арналған 31 мамар - барша қазақстандықтар үшін қастерлі күн. Бүгін еліміздің түкпір-түкпірінде 4 мыңнан астам әртүрлі іс шара жүзеге асырылуда. Ел басына күн туған қаралы кезеңде Ақтөбе халқының да тартқан тауқыметі орасан зор. Сондықтан біз мұнда әруақтар алдындағы адами борышымызды орындап, жазықсыз жапа шеккен жандардың рухына тағы бір мәрте тағзым етеміз. Ақтөбе облысында 8 мыңдай адам саяси қуғын-сүргінге ұшыраған. Олардың 2 мыңнан астамы ату жазасына кесілген. Ату жазасына кесілгендер осы Түйетөбе сайында жерленген. Зұлмат замандарда арыстардың көрген қасіретін ішке бүгіп келдік. Сондықтан мұндай қасиетті топырақты қастер тұту біздің перзенттік парызымыз»,-деді Мемлекеттік хатшы Гүлшара Әбдіхалықова.
«Ашаршылық жылынан кейін аман қалған азаматтардың көпшілігі атылды, айдауда болды, зардап шекті. Атылған азаматтардың дені Алаштың арда азаматтары еді. Бұл әрбір қазақтың отбасында болған жағдай ғана емес, сол уақыттағы миллиондаған бауырымызға ортақ қасірет болатын. Бүгінгі күні тәуелсіздіктің арқасында «Түйетөбе» басына келіп, жыл сайын тағзым етеміз. Ағам, нағашым атылды, айдауда болды. Бірі Түйетөбеде жатыр. Сондықтан біз жыл сайын осы жерге келеміз»,- деді ақтөбелік ардагер Роман Рахимов.
«ХХ ғасыр аштық пен қудалаудан зардап шеккен қазақ халқы үшін ең қиын кезең болды. Сол жылдары біз халықтың тәжірибесі мен дәстүрлерінің алтын қорын жоғалттық. Қазақстанның тәуелсіздігі арқасында біз жоғалтқанымызды қалпына келтіре алдық, бірақ біз тарихтың қайғылы беттерін, еліміздің болашағы үшін өз өмірін құрбан еткендерді ұмытпауымыз керек. Біз олардың алдында қарыздармыз. Біз жас ұрпақты Отанына деген сүйіспеншілік рухына тәрбиелеуіміз керек. Жастар өз тарихын ұмытпай, бірлік, достық, тұрақтылықты сақтауы керек. Тоталитарлық режім құрбандарының есімі әрдайым біздің жүрегімізде тұрады», - деді облыс әкімі Бердібек Сапарбаев.