Халықаралық сарапшылар құқықтық семинарға қатысушыларды БҰҰ комитетіне жеке өтініш білдіру жайымен таныстырды

АСТАНА. Маусымның 25-і. ҚазАқпарат - Астанада маусымның 24-і мен 25-і аралығында Адам құқықтары жөніндегі уәкіл Астана қаласындағы ЕҚЫҰ Орталығымен және Дания Адам құқықтары жөніндегі институтпен бірлесіп «Шағымдарды Біріккен Ұлттар Ұйымының адам құқықтары жөніндегі халықаралық шарттарына сәйкес ұсыну және қарау (рәсімдері мен механизмдері)» тақырыбында семинар өткізді.

Бұл туралы Адам құқықтары жөніндегі уәкілдің баспасөз орталығы хабарлады.

Аталмыш семинар жұмысына Парламент депутаттары, Президент Әкімшілігінің, басқа да мемлекеттік органдардың, халықаралық және үкіметтік емес ұйымдардың, ғылыми орталардың, бұқаралық ақпарат құралдарының өкілдері қатысты.

Халықаралық сарапшылар семинарға қатысушыларды БҰҰ комитеттеріне жеке шағымдарды беру және оларды қарау тәртібі мәселелерімен таныстырды.

Талқылау барысында адамның әділ сот талқылауына, өз пікірін еркін білдіруге құқықтарын іске асыру саласында сындарлы пікір алмасты.

Қатысушылар тарапынан семинар қорытындылары бойынша оны өткізудің өзектілігі мен қазіргі уақытқа сай екендігі, ұлттық заңнамаға жалпыға танымал халықаралық нормалар мен стандарттарды одан әрі енгізу қажеттігі туралы ортақ пікір айтылды.