Ханшайым Диананың кабриолеті бәссаудада сатылды

АСТАНА. ҚазАқпарат - Корольдік жанұя мүшелері мен танымал тұлғалар меншігінде болған автокөліктер аукцион арқылы сатылды, олардың жалпы құны 450 мың фунтты (565 мың доллар) құрады, деп хабарлайды Би-би-си.

Сенбі және жексенбі күндері NEC Classic Motor Show автошоуында «Тақ маржандары» атты көліктер коллекциясы сатылымға шығарылды.

Бір кездері ханшайым Диана мінген 1994 жылғы Audi кабриолеті 54 мың фунтке (68 мың доллар) сатылды. Ол бар-жоғы 6,5 мың шақырым ғана жүрген.

Сатылымға қойылған топтама арасында Элтон Джонға тиесілі Rolls-Royce Phantom да бар. Ол 124 мың фунт (155 мың доллар) болып бағаланды, соңғы рет бұл көлікті Э.Джон 2005 жылы үйлену тойында мінген.

Дәл осы маркадағы Катар корольдік үйінің Rolls-Royce Corniche кабриолеті 135 мың фунт (170 мың доллар) болды.

Журналистердің назарын аударған тағы бір көлік 1972 жылы шыққан Fiat 500L болды. Бұрынғы премьер-министр Дэвид Кэмеронның әйелі Самантаға тарту еткен бұл көлігі 21 мың фунтқа (26 мың доллар) сатылды.

Бірақ, сатылымға шығарылған бірнеше көлік өтпей қалды. Мәселен, 215 мың фунт (270 мың доллар) тұратын Елизавета патшайымның 2012 жылғы Bentley Mulsanne көлігін сатып алушы табылмады. Сондай-ақ, актер Майкл Уиннерге тиесілі 1976 жылғы Bentley, ханшайым Маргарет мінген 1980 жылғы Rolls-Royce сатылған еді.