АСТАНА. ҚазАқпарат - Құрлықтық хоккей лигасының кезекті матчында Астананың «Барысы» өз айдынында Мәскеудің «Динамосын» қабылдады.
«Қазспорт» телеарнасынан тікелей эфирде көрсеткеніндей, алғашқы екі кезеңде есеп ашылған жоқ. Шешуші, үшінші кезеңде астаналық команда «Динамо» ойыншыларының тәртіп бұзып, айдыннан қуылғанын тиімді пайдаланып, Майк Ландин есеп ашты. Бірақ кездесу бітуге 3 минут 30 секунд қалғанда, Юусо Хиетанен «Барыс» қақпасын дәл көздеп, таразы басын теңестіріп кетті. Бұдан кейін овертайм ешқандай нәтиже берген жоқ.
Буллит соғуда «Барыс» жеңіске жетіп, екі ұпайға ие болды. Бұл - астаналықтардың биылғы маусымдағы буллит сериясындағы алғашқы жеңісі. Осы ойыннан кейін 51 ұпай жинаған «Барыс» Шығыс конференциясында тоғызыншы орында келеді. Сегізінші сатыдағы Нижнекамскінің «Нефтехимик» командасынан астаналықтардың төрт ұпайы кем. Бұл - олардың үздік сегіздікке ілігуіне мүмкіндік бар деген сөз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).