АСТАНА. ҚазАқпарат - Құрлықтық хоккей лигасының (ҚХЛ) соңғы ойынын «Барыс» өз айдынында Омбының «Авангард» командасымен өткізді, деп хабарлайды «ҚазАқпарат» тілшісі.
Астаналықтар плей-офф кезеңіне шығудан үмітін әлдеқашан үзген болса, омбылықтар үшін жеңіс ауадай қажет еді.
Бірінші кезеңде 4-минутта қонақтардан Кирилл Семенов мергендігімен көзге түсіп, есеп ашты. Бұдан кейін айдын иелерінен Алексей Маклюков, Иван Кучин және Ярослав Евдокимов қатарынан үш гол соғып, «Барыс» 3:1 есебімен алға шықты. Әйтсе де елордалықтар екінші кезеңде осы басымдылықты сақтай алмады. Данил Файзуллин мен Кирилл Семенов таразы басын теңестірді.
Үшінші, шешуші кезеңде қалайда үш ұпай алуға тырысқан «Авангард» қақпашысын алтыншы ойыншыға ауыстырды. Бұл тактика өз жемісін беріп, матч бітуге бір минут қалғанда, Семен Кошелев жеңіс голын соғып кетті.
Осылайша, «Барысты» 4:3 есебімен тізе бүктіріп, ұпай санын 88-ге жеткізген «Авангард» командасы Шығыс конференциясында жетінші орынға көтеріліп, плей-офф кезеңіне жолдама алды. Астаналықтар 74 ұпаймен оныншы орында қалды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).