АСТАНА. ҚазАқпарат - Астананың «Барысы» бүгін Омбыда «Авангард» командасынан шешуші, жетінші бәсекеде жеңіліс тауып, Құрлықтық хоккей лигасының келесі кезеңіне өте алмады.
Бұл кездесудің бесінші минутында Найджел Доус есеп ашқанымен, сол басымдықты астаналықтар ұстап тұра алмады. Арада бес минут өткенде «Авангардтан» Чад Коларик есепті теңестірсе, 36-минутта айдын иелерін Александр Пережогин алға шығарды. Матч соңына таман есепті теңестірмек болған астаналықтар қақпашыны айдындағы ойыншымен алмастырды. Осыны сәтті пайдаланған Ч.Коларик бос тұрған қақпаны дәл көздеп, есепті 3:1-ге жеткізді. Жеті матчтан тұратын бұл серияда омбылықтар 4:3 есебімен жеңіске жетті.
Сөйтіп «Барыс» биылғы маусымды аяқтаса, «Авангард» Шығыс конференциясының жартылай финалында Қазанның «Ақ Барысымен» сынға түседі.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).