НҰР-СҰЛТАН. ҚазАқпарат – Құрлықтық хоккей лигасының кезекті матчында елордалық «Барыс» Қазан қаласында «Ак Барс» командасымен күш сынасады, деп хабарлайды ҚазАқпарат тілшісі.
Айдын иелері Шығыс конференциясында 53 ұпаймен төртінші орында тұрса, 40 ұпайы бар «Барыс» жетінші сатыда келеді.
Өткен турда «Ак Барс» Қазанда Челябінің «Тракторын» 5:1 есебімен сүріндірсе, елордалықтар Екатеринбургте өзінің негізгі қарсыластарының бірі «Автомобилисті» ұтқан еді (2:0).
Биылғы маусымда қос команданың екі мәрте жолдары тоқайласты. Қазақстан астанасында 10 қазанда «Ак Барс» елордалық клубты 6:3 есебімен жеңсе, кейін 6 желтоқсанда Юрий Михайлистің шәкірттері Қазанда есе қайтарған еді - 2:1.
Әр конференциядан алғашқы сегіз команда плей-офф бәсекесіне жолдама алатындықтан, Юрий Михайлис шәкірттері үшін бұл кездесу де маңызды болмақ.
«Ак Барс» – «Барыс» матчы Нұр-Сұлтан уақытымен сағат 22.30-да басталып, «Qazsport» телеарнасынан тікелей эфирде көрсетіледі.
Еске сала кетейік, бұдан бұрын «Барыстың» «Автомобилист» командасынан басым түскенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).