АСТАНА. ҚазАқпарат - «Барыс» Құрлықтық хоккей лигасындағы кезекті ойынын бүгін елордада Ресейдің «Нефтехимик» (Нижнекамск) клубына қарсы өткізді, деп хабарлайды ҚазАқпарат тілшісі.
Алғашқы кезеңде ресейлік клуб сапынан 1-минутта Аксель Галимов есеп ашты.
Бұдан кейін қазақстандық команда хоккейшілері таразы басын теңестіруге ұмтылған еді. Дегенмен таблодағы есеп өзгерген жоқ.
Екінші кезеңнің 23-минутында Максим Гончаров ресейлік клубтың басымдығын арттырса, көп ұзамай Илья Хохлов есепті үстемелей түсті.
Ал 34-минутта «Барыс» сапынан Егор Петухов қақпашымен бетпе-бет шығып, өз мүмкіндігін мүлт жіберген жоқ.
Ойынның 59-минутында қазақстандық командадан Энтони Луис есеп айырмасын қысқартса, көп ұзамай «Нефтехимик» хоккейшісі Павел Порядин кездесу нүктесін қойды.
Осылайша елордалық клуб қарсыласына 2:4 есебімен есе жіберді.
Енді «Барыс» алдағы ойынын 25 қазанда Ресейде «Авангард» (Омбы) командасына қарсы өткізеді.
Еске салсақ, бұдан бұрын елордалық клуб «Металлург» командасынан жеңіліп қалды.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.