АСТАНА. ҚазАқпарат - Құрлықтық хоккей лигасында (ҚХЛ) өнер көрсететін Астананың «Барысы» жеңілістен көз аша алар емес, деп хабарлайды «ҚазАқпарат» тілшісі.
Бұл жолғы кездесуін Ғалым Мәмбетәлиев уақытша жаттықтырып жүрген астаналықтар Владивостокта өткізді. Олар Шығыс конференциясында 12-орында келе жатқан «Адмирал» командасымен кездесіп, 1:3 есебімен есе жіберді. «Адмиралдан» Артем Земченок, Максим Казаков, Андрей Алексеев көзге түссе, оған «Барыстан» Антон Сагадеев бір ғана голмен жауап қайырды.
Осылайша, елордалықтар соңғы 19 ойынның 17-сінде жеңіліс тапты. Сегіз матч қатарынан ұтылып отырған «Барыс» плей-офф бәсекесінен біржола үмітін үзді деп айтуға болады. Қалған алты ойында астаналықтар мұндай «қарқынымен» ұпай алады деп айту қиын.
Айта кетейік, Шығыс конференциясында бұрынғыша 63 ұпаймен оныншы орында келе жатқан «Барыс» келесі бәсекесін 16 қаңтар күні Тольяттиде көш соңындағы «Лада» командасымен өткізеді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).