НҰР-СҰЛТАН. ҚазАқпарат - Шайбалы хоккейден Қазақстан чемпионаты 26 тамызда басталады. Бұл шешім Қазақстан хоккей федерациясының клуб басшыларымен өткен онлайн-жиналысында кеңінен талқыланды, деп хабарлайды ҚазАқпарат тілшісі.
Федерация еліміздегі эпидемиологиялық жағдайға байланысты Қазақстан біріншілігін өткізудің өзге де жолдарын қарстырып отыр. Қазір оның үш жобасы жасалған.
Қазақстан кубогы 2020 жылдың желтоқсан айында өткізіледі деп жоспарлануда. Оның нақты мерзімі мен өтетін орны оған қатысуға ниет білдірген командалар өтінішіне сай қарастырылады.
«Ал жастар лигасы биылғы жылдың қыркүйек айында басталуы тиіс. Ал қыздар арасындағы чемпионат қыркүйек немесе қазан, наурыз немесе сәуір айларына белгіленетін үш тур негізінде жүргізіледі», - деп жазылған федерация таратқан хабарламада.
Естеріңізге сала кетелік, Қазақстан чемпионатының 2019/20 жылғы кезеңі коронавирус пандемиясына байланысты наурыз айында тоқтатылған. Нәтижесінде чемпионаттың биылғы жеңімпазы анықталған жоқ.
Бұдан бұрын хоккейден ҚР Президенті Кубогына қатысатын командалар белгілі болды.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.