НҰР-СҰЛТАН. ҚазАқпарат - Чехияда өтіп жатқан шайбалы хоккейден 20 жасқа дейінгі жастар құрамалары арасындағы әлем чемпионатында Қазақстан құрамасының шабуылшысы Максим Мусоров сұрмергендер көшінде екінші орында келеді, деп хабарлайды ҚазАқпарат тілшісі.
Қазақстан жастар құрамасы әлем чемпионатында төрт кездесу өткізіп, барлығында қарсыластарына есе жіберді. Алдымен Швейцариядан 3:5 есебімен жеңілген қазақстандық хоккейшілер одан кейін Словакиядан 1:3, Финляндиядан 1:7 , Швециядан 2:6 есебімен жол берді. Аталмыш төрт кездесуде Максим Мусоров төрт голдың авторы атанды. Сұрмергендер көшін швед хоккейшісі Самуэль Фагемо 6 голмен бастап тұр. Одан кейінгі орындағы Максим Мусоровтан өзге Роберт Джуган (Словакия), Артур Калиев, Шейн Пинто (екеуі - АҚШ), Патрик Пуйстола (Финляндия), Либор Забрански (Чехия) сынды хоккейшілердің еншісінде төрт-төрт шайбадан бар.
Қазақстан жастар құрамасы енді 2, 4, 5 қаңтар күндері Германиямен жұбаныш кезеңінде шеберлік байқасады.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.