ҚЫЗЫЛОРДА. ҚазАқпарат - Елордада жыл сайын ұйымдастырылатын шайбалы хоккейден Қазақстан Президенті кубогы биыл өткізілмейді. Бұл жөнінде «Барыс» командасы мәлім етті, деп хабарлайды ҚазАқпарат тілшісі.
Аталған турнир 7-11 тамыз күндері өтуі тиіс еді. Оған елордалық «Барыстан» өзге Оңтүстік Корея құрамасы, Ресейдің «Сибирь» (Новосібір) және Беларусьтың «Динамо» (Минск) командаларының қатысуы жоспарланған болатын.
Ел Үкіметінің шешімімен карантиндік шектеу шаралары 2 тамызға дейін ұзартылды. Осыған орай «Барыс» маусым алдындағы оқу-жаттығу жиынын 3 тамыздан кейінге шегеру туралы ұйғарымға келді. Ал жылма-жыл ұйымдастырылып жүрген Қазақстан Президенті кубогын өткізілмейтін болды.
Естеріңізге сала кетелік, аталған дүбірлі дода 2010 жылдан бері тұрақты түрде ұйымдастырылып келеді. Турнирде «Барыс» 2010, 2011, 2013, 2015 жылдарда чемпион атанды. Сондай-ақ, Ресейдің СКА (Санкт-Петербург), «Авангард» (Омбы), «Металлург» (Новокузнецк), «Нефтехимик» (Нижнекамск) және «Амур» (Хабаровск) клубтары әр жылдарда жеңімпаз тұғырынан көрінді.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.