Хормен ән айтудан рекорд орнатылды - Үндістан
09:00, 14 Мамыр 2009
НЬЮ-ДЕЛИ. Мамырдың 14-і. ҚазАқпарат - Гиннестің рекордтар кітабы хормен ән айтудың жаңа рекордын тіркеді.
Үндістанда жасалған бұл рекордқа 160 мың адам атсалысты, деп хабарлайды ҚазАқпарат IANS агенттігіне сілтеме жасап. Хормен ән орындаудың бұған дейінгі рекорды 1937 жылы Германияда тіркелген, ол жолы 60 мың адам ұлттық әнұранды орындаған. Ал өткен жексенбіде Үндістанның Хайдерабад қаласында ондаған мың үнділік бас қосып, үндінің Вишну құдайын мадақтаған ортағасырлық ақын Аннамачарьидің сөзіне жазылған жеті әнді орындады. «70 жылдан астам уақыт бұрын орнатылған рекордтың жаңартылғанын қуанышпен хабарлаймын», - деп мәлім етті жиналған қауымға Гиннестің рекордтар кітабының өкілі Реймонд Маршал.