Иордания СІМ Израиль шекарасындағы шабуылды айыптады
АСТАНА. KAZINFORM – Амман Батыс жағалаумен шекарадағы шабуылды батыл түрде айыптап, оны халықаралық құқықты өрескел бұзу және патшалықтың гуманитарлық күш-жігеріне қауіп төндіру деп атады, деп хабарлайды Kazinform агенттігінің меншікті тілшісі.
Бейсенбіде иорданиялық жүк көлігінің жүргізушісі Иорданияда «Король Хусейн көпірі» деп аталатын Алленби бақылау бекетіне шабуыл жасады. Оқиға барысында ол тапанша мен пышақ қолданған, нәтижесінде екі израильдік – БӨП қызметкері қаза тапты, тағы екеуі ауыр жарақат алды.
Бақылау бекетінің күзеті оқ жаудырып, шабуылдаушының көзін жойды. «Король Хусейн көпірі» (Аль-Караме) бақылау бекетіндегі шабуыл «халықаралық құқықтың елеулі бұзылуы және Иорданияның Газа секторына көмек көрсетудегі негізгі рөліне тікелей қауіп төндіреді». Бұл туралы Иордания СІМ мәлімдемесінде айтылды. Ведомство ел мүддесіне қауіп төндіретін «зорлық-зомбылық пен құқыққа қайшы әрекеттерді қатаң түрде қабылдамау» міндеттемесін атап өтті.
Кейінірек Иордания тарапы шабуылдаушының жеке басын анықтады. Ол 56 жастағы Абдель-Мутталиб әл-Кайси болып шықты. Ол соңғы үш айда Газа секторына рейстер жасаған азаматтық гуманитарлық жүк көлігінің жүргізушісі болған.
Сонымен қатар Иордания СІМ Израильдің Газаға қарсы әскери агрессиясын дереу тоқтату қажеттілігін атап өтті және атысты тоқтатуды талап етті. Сондай-ақ, мәлімдемеде халықаралық қауымдастықты екі мемлекет негізінде шешімге қол жеткізу үшін тиімді дипломатиялық бастамаға шақырып, өршудің аймақтық салдары туралы ескертті.
Оқиғаға байланысты Иорданияның қоғамдық қауіпсіздік дирекциясы «Король Хусейн көпірі» бақылау бекеті арқылы жолаушылар тасымалын одан әрі ескертуге дейін тоқтата тұратынын жариялады және азаматтарды шекара бекетінің жұмысын қайта бастау туралы ресми хабарландыруларды қадағалауға шақырды.
Израиль билігі шабуылға жауап ретінде Алленбиді (Король Хусейн көпірі) жауып тастады — Батыс жағалаудағы Иорданияға және сыртқы әлемге жалғыз өткел. Израиль әуежайлары басқармасы Иордан өзенінің солтүстік өткелі де жабылғанын, ал Рабиннің Оңтүстік өткелі тек қызметкерлер үшін ашық екенін хабарлады. Египет шекарасындағы Таба өткелі әдеттегідей жұмыс істейді. Шекара өткелі Газа секторындағы палестиналықтарға гуманитарлық көмек көрсету үшін қолданылады.
Иордания СІМ бейсенбіде Газада гуманитарлық көмекпен 22 Иорданиялық жүк көлігі жүргенін растады, ал операция басталғаннан бері барлығы 201 колоннаның құрамында 8 664 жүк көлігі шекара арқылы жіберілді. Дипломатиялық ведомствоның айтуынша, Иордания анклав үшін маңызды гуманитарлық дәлізге айналды.
Естеріңізге сала кетейік, осы жылдың басында Қазақстан Исламдық азық-түлік қауіпсіздігі ұйымы арқылы және Иорданияның көмегімен Газа секторына ұн жіберген болатын. Гуманитарлық көмек тиелген жүк көлігі дәл осы бақылау-өткізу пункті арқылы шекарадан өтті. Бұған дейін осы БӨП арқылы палестиналық дәрігердің отбасы Газа секторынан Қазақстанға көшірілді.