muslim.kz сайтының жазуынша, Мысыр президенті Мұхаммед Мурси ирандық әріптесін үлкен құрметпен қарсы алды. Мурси өз кезегінде былтырғы жылдың тамыз айында Тегеранға барған еді. Сол сапар кезінде Тегеран мен Каирде екі елдің елшіліктерін ашу туралы келісімге қол жеткізілген болатын. Иран-Мысыр арасындағы жақындық 2011 жылы Хосни Мүбәрәкті тағынан құлатқан «араб көктемінен» кейін жанданып сала берді.
Махмұд Ахмадинежад осы жолғы сапарының аясында Каирде өтетін Ислам Ынтымақтастығы Ұйымының (ИЫҰ) саммитіне қатыспақшы. Саммит жұмысы ертең басталмақ. Сонымен бірге, ол Әл-Азхар университетінің төрағасы және мешітінің бас имамы, шейх Ахмед Әл-Таибпен кездеседі.