Иран уранды байытуды жалғастырмақ

АСТАНА. KAZINFORM — Иран Сыртқы істер министрінің орынбасары Аббас Аракчидің мәлімдеуінше, Иран уранды байыту жұмыстарын жалғастырады және бұл құқығынан бас тартпайды, деп хабарлайды ИРНА. 

— Жақында болған жанжалдан кейін оларды Иран Ислам Республикасының ұстанымы күшті және берік болып қала беретінін және біз байытудың жалғастыратынымыз туралы ақпараттандыру қажет болды. Біз Иран халқының бұл құқығынан бас тартпаймыз, — деді Аббас Аракчи Ыстанбұлда Иран мен еуропалық «үштік» арасындағы келіссөз қорытындыларына түсінік беріп. 

Аббас Аракчи сондай-ақ Иран Ислам Республикасының ақылға қонымды және қисынды шеңберде бейбіт мақсаттағы ядролық бағдарламасын дамытуға әрқашан дайын екенін қосты. 

— Біз алаңдауы мүмкін елдердің сеніміне ие болуды ешқашан назардан тыс қалдырған емеспіз. Алайда, Ислам Республикасы өз кезегінде ядролық энергияны байытуды қоса алғанда бейбіт мақсатта пайдалану құқығының сақталуын талап етеді, — деп атап өтті ол.

Еске сала кетсек, 22 шілдеде Тегеранда Иран, Ресей және Қытай өкілдерінің үшжақты кездесуі өтті. Келіссөздің басты тақырыбы Иранның ядролық бағдарламасы төңірегіндегі дағдарысты реттеу мәселесі болды.