ОРАЛ. KAZINFORM – Орынбор облысында Иреклі қоймасынан 14 ақпаннан бастап Жайық өзеніне жіберіліп жатқан су көлемі секундына 108 текше метрге жетті.
«Қазсушар» РМК Батыс Қазақстан филиалы директорының міндетін атқарушы Рауан Хұсайыновтың Kazinform тілшісіне мәлім еткеніндей, өткен жылы осы мерзімде Ирекліден Жайыққа секундына 15 текше метр су құйылған болатын.
- Бұдан әзірге қауіп жоқ. Жайықтағы судың деңгейі қатты көтерілмейді. Су өңірге 25-30 күндей уақытта, наурыздың ортасына қарай жетеді, - деді маман.
Оның айтуынша, қазіргі кезде Жайық өзенінің Орал қаласы тұсындағы деңгейі – 157 сантиметр. Өткен жылы осы мерзімде 138 сантиметр болған еді.
«Қазгидромет» РМК БҚО филиалының алдын ала болжамына қарағанда, биыл Деркөл өзенінің деңгейі қауіпті шектен асуы ықтимал. Осыған байланысты Тасқала және Бәйтерек ауданында өзен бойында орналасқан ауылдарға, оған қоса Орал қаласына қауіп төнуі мүмкін.
Еске сала кетейік, бұдан бұрын Иреклі қоймасынан Жайық өзеніне жіберілетін су көлемі артатынын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).