«Ирина Қайратовнаның» қайтыс болған мобилографының алдын ала диагнозы айтылды

Астана қаласының Қоғамдық денсаулық сақтау басқармасы «Ирина Қайратовна» тобының мобилографы Жылқайдар Шахназдың өліміне себеп болған алдын ала диагнозды жариялады, деп хабарлайды Кazinform.

«14 қазанда Жылқайдар Шахназдың денесі сот-медициналық сараптама жұмыстарын жүргізу үшін Сот сараптама институтына жеткізілді. Өлімнің алдын ала себебі — жедел геморрагиялық панкреонекроз.

Өлімнің нақты себебі токсикологиялық зерттеу нәтижелерін алғаннан кейін белгілі болады. Зерттеу жұмыстары екі аптаға дейін жүргізіледі», - делінген әкімдік мәліметінде.

Ж.Шахназ 21 жаста болған. 

Еске салайық, «Ирина Қайратовна» тобы 14 қазан күні Астанада концерт берді. Оның барысында мобилограф Жылқайдар Шахназ ес-түссіз құлап қалды. Медицина мамандары оның қайтыс болғанын мәлімдегеннен кейін концерт тоқтатылды.

Белгілі топ елордада 15 қазанда өтуі тиіс болған концерттің де өтпейтінін жариялады.