НҰР-СҰЛТАН. ҚазАқпарат - Түркияның Конья қаласында өтіп жатқан Ислам ынтымақтастығы ойындарында жалпы командалық есепте қазақстандық спортшылар төртінші орында келеді, деп хабарлайды ҚазАқпарат тілшісі.
Қазақстандық спортшылар қазірге дейін 36 медаль еншілеп үлгерді. Олардың 12-і алтын, 5-і күміс, 19-ы қола.
Өткен тәулікте ауыр атлет Зульфия Чиншанло (59 келі), әйелдер күресінен Елена Шалыгина (65 келі) чемпион тұғырына көтерілді.
Ал таеквандодан 87 келіде Бауыржан Хасенов, грек-рим күресінен 55 келіде Аманғали Бекболатов қола жүлдеге қол жеткізді.
Сондай-ақ, спорттық гимнастикадан ел құрамасы аталған додада 3 күміс, 1 қола алды.
Жалпы командалық есепте Түркия 114 (41 алтын, 41 күміс, 32 қола), Иран 54 (22 алтын, 18 күміс, 16 қола), Өзбекстан 53 (18 алтын, 14 күміс, 21 қола) медальмен алғашқы үштікте келеді.
Ислам ынтымақтастығы ойындары 2005 жылдан бері тұрақты өткізіліп келеді. Биыл бесінші мәрте жалауын желбіретті.
Биылғы додада 55 елден спортшылар келді. Ойындар 8 тамызда басталды. Ол 18 тамызда мәресіне жетеді.
Фото: olympic.kz
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.