Испания ЕО-ны Израильге қарсы қатаң шаралар қолдануды талап етті

АСТАНА. KAZINFORM —  Жозе Мануэль Альбарес Брюссельдегі Еуропалық Одақ сыртқы істер министрлерінің кездесуінде Израильге қатысты батыл шаралар қолдануды, оның ішінде санкциялар енгізуді ұсынды, деп хабарлайды Анадолы.

Ол отырыс алдында журналистерге берген сұхбатында Еуропалық Одақ пен Израиль арасындағы әріптестік келісімінің уақытша тоқтатылуын, қару-жарақ эмбаргосын және жауапты израильдік шенеуніктерге жеке санкциялар қолдануды талап ететінін айтты.

— Еуропалық Одақ Газадағы геноцидті жалғастырып жатқан Израильге қарсы санкцияларды енгізуде табандылық танытуы тиіс. Әйтпесе, қалғанның бәрі бекер болады, — деп мәлімдеді Испания Сыртқы істер министрлігінің басшысы.

Бұдан бұрын БҰҰ Бас хатшысы Антониу Гутерриш АҚШ-тың Иранға қарсы жасаған әрекеттеріне байланысты терең алаңдаушылық білдіріп, бұл жағдайды халықаралық қауіпсіздік пен тұрақтылыққа қатер төндіретін қауіпті эскалация ретінде бағалады.

Сонымен қатар Өзбекстан Таяу Шығыстағы қақтығысты келіссөз арқылы шешуге шақырды.

Ал G7 Израильге қолдау білдіріп, Иранды Таяу Шығыстағы басты қауіп көзі ретінде атады.