Ыстанбұлдан Ташкентке бағыт алған ұшақ бортында сәби дүниеге келді

ТАШКЕНТ. KAZINFORM – Түркияның Ыстанбұл қаласынан Өзбекстан астанасына бағыт алған Uzbekistan Airways әуекомпаниясына тиесілі ұшақ бортында сәби дүние есігін ашты, деп хабарлайды Kazinform агенттігінің меншікті тілшісі.

Компанияның мәліметіне сай, ұшу барысында әйел толғата бастаған. Қуанышқа орай, жолаушылар арасында болған екі дәрігер оған дер кезінде медициналық көмек көрсетті.

Кейін экипаж мүшелері әуе кемесін Өзбекстанның Хорезм облысына қарасты Үргеніш қаласының әуежайына қондырды. Тиісінше, ол жерде күтіп тұрған медицина қызметкерлері босанған ананы сәбиімен бірге жергілікті перзентханаға жеткізді. Үргенішке бірер сағат аялдаған ұшақ кейін Ташкентке бет алды.

Қоса кетейік, бірнеше күн бұрын Алматы қалалық перинаталдық орталығында үшем дүниеге келгенін жазып едік.

Сонымен қатар, биыл мамырда «Астана – Жезқазған» бағытындағы пойызда нәресте дүние есігін ашты.