Италияда су тасқыны салдарынан 3 адам қаза тапты

АСТАНА. KAZINFORM — Италияның Валле-д’Аоста өңірінде 6400 адам жарықсыз қалды, деп хабарлайды Анадолы.

Италияның солтүстігінде нөсер салдарынан су тасқыны болып, 3 адам қайтыс болды.

БАҚ ақпаратына сәйкес, Италияның солтүстік-батысындағы Турин маңындағы Монтеу-да-По қалашығында 92 жастағы ер адам су тасқынының көтерілуіне байланысты далада қалып, суға батып кеткен.

Виченца қаласына жақын Вальданьо ауданында әкесі мен баласы көлікпен су тасқынынан қашуға тырысқан кезде лай көшкініне тап болып шұңқырға түсіп, із-түзсіз жоғалып кеткен. Италия өрт сөндіру қызметінің X платформасындағы хабарламасында әкесі мен баласының мәйіттері 18 сәуір күні таңертең шұңқырдан шығарылғаны айтылған.

Тренто аймағындағы Сан-Мартино ауданында қатты жауын-шашын лай көшкінін туындатып, сақтық шарасы ретінде 14 адам эвакуацияланған.

Валле-д’Аоста аймағында қолайсыз ауа райы жағдайларына байланысты 6400 адам электр қуатынсыз қалған.

Турин орналасқан Пьемонт аймағында дабыл деңгейі ең жоғары «қызыл» деңгейден «қызғылт сары» деңгейге төмендетілген.

Бұған дейін Италияда екі Қытай азаматы оққа ұшқаны хабарланды.