Италиядағы зілзаладан зардап шеккендердің қатарында қазақстандықтар жоқ - ҚР СІМ
16:42, 24 Тамыз 2016
АСТАНА. ҚазАқпарат - Алдын ала мәліметтер бойынша, Италиядағы зілзаладан зардап шеккендердің қатарында қазақстандықтар жоқ. Бұл туралы «ҚазАқпарат» тілшісіне ҚР Сыртқы істер министрлігінің баспасөз хатшысы Әнуар Жайнақов мәлім етті.
«Алдын ала мәліметтер бойынша, зілзаладан зардап шеккендердің қатарында біздің азаматтар жоқ. Бірақ біз анықтау бойынша жұмысты доғарған жоқпыз. Біздің дипломаттар сонда анық-қанығын білу үшін аттанды», - деп атап өтті Ә.Жайнақов.
Бүгін БАҚ беттерінде хабарланғанындай, Италияның орталығында орналасқан Аматриче қаласында жойқын зілзала салдарынан соңғы мәлімет бойынша 38 адам қаза тауып, жүздеген адам жарақаттанған.
Италияның азаматтық қорғаныс қызметі мәлім еткеніндей, зілзала қуаты «күшті» деп бағаланды.