IV «Жас Барыс» турнирінде 260 палуан бақ сынасады

АСТАНА. ҚазАқпарат - Қарашаның 4-7 күндері қазақ күресінен «Жас Барыс» республикалық турнирі төртінші рет жалауын көтереді. Оралда өтетін жас оғландардың белдесуі биыл тартысты болғалы тұр. Жас мөлшеріне қарай үш топ бойынша өтетін республикалық турнирге 260 палуан қатысып, әр салмақ бойынша мықтыны анықтайды.

Биылғы «жас барыстар» Орал қаласындағы «Арман» спорт кешенінде белгілі болмақ, деп хабарлайды "Қазақстан барысы".

«Жас Барысқа» қатысушылар жас шамасына қарай мынадай топтарда күреседі: - балалар (2000-2001 ж.т., 14-15 жас) - жасөспірімдер (1998-1999 ж.т., 16-17 жас) - жастар (1996-1997 ж.т., 18-19 жас).

Бұл республикалық турнир IV кезең бойынша өтеді. Яғни, қатысушылар әуелі І-ІІ кезеңде ауылдық елді мекендер мен аудандық іріктеуден (2015 жылдың 15-30 қыркүйегі арасында) өтуі тиіс. ІІІ кезеңде - облыстық (қалалық) іріктеу жарыстарында сынға түссе (2015 жылдың 1-31 қазан аралығында), ІV кезеңде үздік шыққандар турнирдің финалына жолдама алады (4-7 қараша күндері).

Шарт бойынша палуандар жас шамасына қарай мынадай салмақта кілемге шығады:

14-15 жастағы балалар: 38, 42, 46, 50, 55, 60, 66, 73, + 73 келі салмақ дәрежелері; 16-17 жастары жасөспірімдер: 46, 51, 57, 64, 72, 81, +81 келі салмақ дәрежелері; 18-19 жастағы жастар: 55, 60, 66, 74, 82, 90, 100, +100 келі салмақ дәрежелері.

Турнирдің жүлдегерлеріне Спорт және дене шынықтыру істері комитеті тарапынан планшет, фотоаппарат, смартфон, диплом және медальдар тапсырылады.