Иван Ромазан мемориалы: «Барыс» бүгін «Салават Юлаевпен» кездеседі

АСТАНА. KAZINFORM — Елордалық «Барыс» бүгін шайбалы хоккейден маусым алдындағы дәстүрлі Иван Ромазан мемориалына екінші ойынын Ресейдің «Салават Юлаев» (Уфа) командасына қарсы өткізеді.

Кездесу қазақстандық уақытпен 16:00–де басталып, «Qazsport» телеарнасынан тікелей эфирде көрсетіледі. 

Қазірге дейін астаналық команда аталған турнирде «Магниткаға» жол берді.

Елордалық хоккейшілер үшінші ойында 29 тамызда 19:00–де «Металлург» (Магнитогорск) командасымен шеберлік байқасады.

Елордалық команда турнирге 25 тамыз күні аттанды. Команда құрамындағы Никита Бояркин, Роман Старченко, Иван Николишин жарақат алған ойыншылар тізімінде тұр. Ал Джейк Масси, Иэн Маккошен, Тайс Томпсон, Оливье Родриг, Мэйсон Морелли, Райли Уолш қажетті құжаттарды рәсімдеп жатыр. Сондықтан олар турнирге қатыса алмайды.

Қазақстандық клуб жаңа маусымда алғашқы үш ойында елордада өткізеді. Алдымен 7 қыркүйекте Ресейдің «Трактор» (Челябинск) командасымен кездессе, одан кейін 9 қыркүйекте «Амур» (Хабаровск), 13 қыркүйекте Беларусьтің «Динамо» (Минск) клубтарымен шеберлік байқасады. 

Астаналық команданың жаңа маусымға оқу-жаттығу жиынының негізгі бөлігі Астанада өткізді.

Алдымен медициналық комиссия тексеруінен кейін екіжақты келісімшартқа қол қойған хоккейшілер 15 шілдеден бастап дайындыққа кірісті. Ал 1 тамыздан бастап біржақты келісімшартқа қол қойған хоккейшілер олардың қатарына қосылды.

Бұдан бұрын «Барыс» хоккей клубы АҚШ ойыншысы Мэйсон Мореллимен біржақты келісімшартқа қол қойғанын жаздық.