Измир әкімшілігінде сыбайлас жемқорлық ісі бойынша 126 адам қамауға алынды
АСТАНА. KAZINFORM - Измирде сыбайлас жемқорлыққа қарсы ірі операцияның нәтижесінде түрік полицейлері 126 адамды ұстады. Олардың арасында қалалық әкімдіктің бұрынғы және қазіргі қызметкерлері, муниципалды компаниялардың қызметкерлері мен мердігер ұйымдардың өкілдері бар, деп хабарлайды Kazinform тілшісі.
Белгілі болғандай, жедел-тергеу шаралары қалалық жобаларды жүзеге асыруда ірі көлемдегі қаржылық бұзушылықтар фактісі бойынша жүргізілген.
Измир прокуратурасы жергілікті мемлекеттік органдарда мемлекеттік сатып алулар саласындағы теріс пайдалану, бюджет қаражатын мақсатсыз пайдалану және тендер рәсімдерін бұрмалау белгілері анықталғанын хабарлады. Күдіктілерге Қылмыстық кодекс бойынша тендерлердің тұтастығына мен мемлекеттік бюджетке залал келтіретін қылмыстық схемаға қатысу баптары бойынша айып тағылды.
Алдын ала мәлімет бойынша, әңгіме 280 миллион түрік лирасынан (шамамен 7 миллиард доллар) асатын сомалар туралы болып отыр. Тергеу 2021-2024 жылдар аралығын қамтиды, ол кезде қалада İZBETON A.Ş. коммуналдық кәсіпорнының қатысуымен ауқымды инфрақұрылымдық және әлеуметтік жобалар жүзеге асырылған.
Ұсталған 126 адамның арасында Измирдің бұрынғы мэрі Тунч Сойер, қалалық әкімдікке қарасты мекемелердің бұрынғы басшылары, сондай-ақ қала үкіметінің қазіргі өкілдері бар. Тергеу аясында 300-ден астам мекенжайда тінту жүргізіліп, құжаттар мен цифрлық сақтау құралдары тәркіленді.
Прокуратура өкілдері тергеу жұмыстары заң аясында қатаң түрде жүргізіліп жатқанын айтты.
- Біз тек заң аясында әрекет етеміз. Қызметіне қарамастан, сыбайлас жемқорлыққа қатысы бар деген күдіктілердің барлығы жауапқа тартылуы керек, - делінген ведомствоның ресми хабарламасында.
Бұл ретте мүшелері тергеуде жатқан оппозициялық Республикалық халық партиясы (РХП) тергеудің ашықтығын қамтамасыз ету қажеттігін және сот төрелігін саяси құрал ретінде пайдалануға жол берілмейтінін мәлімдеді.
- Біз сыбайлас жемқорлықпен күресуді жақтаймыз, бірақ біз заң үстемдігі мен әділ сот принциптерін сақтауға шақырамыз, - деп атап өтті партияның баспасөз қызметі.
Күдіктілерден жауап алу жалғасып жатыр. Алдын алу шарасын таңдау туралы шешім жақын күндері қабылданады. Құқық қорғау органдарының мәліметінше, іс бойынша айыпталушылардың саны артуы мүмкін.