Израиль Газаға шабуылын күшейтіп, кем дегенде 65 адам қаза тапты
АСТАНА.KAZINFORM - Израиль әуе күштерінің Газадағы тұрғын үйлер мен ауруханаларға жаппай соққы беруі құрбандар санының күрт артуына әкелді, деп хабарлайды Kazinform агенттігінің меншікті тілшісі.
Сәрсенбі күні таңертеңнен бері Израильдің Газа секторына жасаған шабуылдарынан кемінде 65 адам қаза тапты, деп хабарлайды AlJazeera-ға сілтеме жасаған медициналық ақпарат көздері.
Қаза болғандардың көпшілігі әйелдер мен балалар. Олар Израильдің Газаның солтүстігіндегі Джабалия аймағындағы бірнеше үйге жасаған жаппай шабуылдың құрбаны болды, дейді дәрігерлер.
Джабалияға жасалған соққы «Исламдық жиһад» тобының Израильдің Ашкелон және Сдерот қалаларына жасалған зымыран шабуылдарына жауап ретінде жасалғаны хабарланды.
Сейсенбі күні кешке ХАМАС-пен байланысы бар палестиналық «Исламдық жиһад» тобы Израильге қарай зымыран атқылаған. Бұған жауап ретінде израильдік әскерилер зымыран ұшырылған аймақтардағы халықты мәжбүрлеп көшіруге бұйрық берді.
Ауруханаларға жасалған соққы
Израильдің сейсенбі күні ауруханаларға жасаған шабуылынан кем дегенде 28 адам қаза тапты, деп хабарлады Газа азаматтық қорғанысы.
Соққылардың бірі Хан Юнис маңындағы Еуропалық аурухана кешеніне тиіп, кем дегенде 28 палестиналық қаза тапты. Израиль армиясы нысана - аурухана астындағы «ХАМАС-тың басқару орталығы» екенін айтты.
Тағы бір шабуылдан Хан-Юнис қаласындағы Насер ауруханасында екі адам, соның ішінде жараланған журналист қаза тапты.
Сәрсенбі күні Израиль БАҚ-тары қауіпсіздік қызметкерлеріне сілтеме жасап, ХАМАС-тың әскери жетекшісі Мохаммад Синвар мен басқа да жоғары лауазымды шенеуніктердің Еуропалық ауруханаға жасалған шабуыл кезінде қаза тапты деп санайтынын айтты. Алайда бұл ақпарат әзірге не Израиль әскері, не ХАМАС тарапынан расталған жоқ.
Анклавтың оңтүстік аймақтары да зардап шекті. Израиль дрондары Хан Юнистің шығысындағы Абасан әл-Кабира қаласындағы тұрғын үйді бомбалады. Салдарынан төрт адамнан тұратын бір отбасы қаза тауып, тағы үш палестиналық жараланды.
Сәрсенбі күні Газа секторының оңтүстігіндегі Хан Юнистің шығысындағы израильдік шабуылдардан екі палестиналық бала қаза тапты, деп хабарлайды Quds News Network.
Хуситтер зымырандарын ұшыра бастады
Осы уақытта Йемендік хуситтер Израильдегі Бен Гурион халықаралық әуежайына қарай зымыран ұшырғанын жариялады. Израиль қорғаныс күштері әуе қорғанысы Йеменнен атылған зымыранның жолын кескенін хабарлады.
Бұл ұшыру Израиль орталығы мен Иерусалим аймағында әуе шабуылының сиреналарын ойнатты, деп хабарлайды The Times of Israel.
Тель-Авивтегі Бен Гурион әуежайында әуе қозғалысы тоқтатылды.
Сейсенбі күні Израиль премьер-министрі Биньямин Нетаньяху Израиль армиясы «операцияны аяқтамайынша» және ХАМАС-ты жеңгенше тоқтамайтынын айтты.
Бұған дейін АҚШ президенті Дональд Трамптың аймаққа сапарынан кейін Израильдің Газа секторында жаңа операция бастауы мүмкін екені хабарланған болатын.