Израиль Иерусалимдегі оқиғаларды көрсеткен 5 медиа-платформаға тыйым салды

АСТАНА. KAZINFORM — Израиль Иерусалим мен «Аль-Акса» мешітіндегі оқиғаларды жариялайтын бес палестиналық медиа-платформаға қызметіне тыйым салғаны белгілі болды, деп хабарлайды Анадолы.

Израиль Қорғаныс министрлігінің шешімі бойынша араб тіліндегі ақпараттық желілер: «Аль-Асима аль-Ихбария», «Мирадж», «Иерусалим Компасы», «Иерусалим алаңы» және «Иерусалим Плюс» жабылды. Тыйым салынған медиа-ресурстардың штаб-пәтері Иерусалимде орналаспаған.

Израильдің Channel 12 телеарнасының хабарлауынша, Шин-Бет (ШАБАК) ішкі қауіпсіздік қызметі жүз мыңдаған жазылушысы бар бұл медиа-платформаларды «террористік ұйымдар тізіміне» енгізуді сұраған.

Қорғаныс министрі Исраэль Кац аталмыш платформаларды террористік ұйымдар тізіміне енгізу туралы шешімге қол қойып, Бас прокурор бұл әрекетке заңдық кедергі жоқ екенін растаған.

Мәліметтерге қарағанда, Иерусалимдегі оқиғаларды жариялайтын платформалар «ХАМАС ұйымының бір бөлімшесі ретінде әрекет етеді» деп көрсетілген. Тыйым салудың негізі ретінде «Иерусалим мен Аль-Акса мешітіндегі оқиғалар туралы провокациялық жарияланымдар» айыпталған.

Шешімнің мақсаты — Иерусалим мен «Аль-Аксаны» оқшаулау

«Аль-Асима аль-Ихбария» платформасы Израиль шешіміне наразылық білдірді.

— Оккупациялық Израиль Иерусалимдегі медиа-платформаларды жауып, қысым көрсету мен басып-жаншу тарихына жаңа парақты қосты. Бұл шешім арқылы Израиль Иерусалим мен Аль-Аксаны оқшаулап, оларды мақсат етіп көрсетіп, болып жатқан оқиғаларды әлемнен жасыруға тырысады, — делінген платформаның хабарламасында.

Сонымен қатар, «Аль-Асима аль-Ихбария» — Иерусалим жергілікті қауымдастығының күш-жігерімен құрылған тәуелсіз медиа-платформа, ол халықаралық қоғамға Иерусалим мен «Аль-Акса» мешітінде болып жатқан бұзушылықтар туралы ақпарат жеткізуге ұмтылады.

Бұдан бұрын 14 ел және халықаралық ұйымдар Израильдегі АҚШ елшісінің мәлімдемесін айыптағанын жазған болатынбыз.