Израильдің Ливандағы әуе шабуылынан қаза тапқандар саны 2 141 адамға жетті

АСТАНА. KAZINFORM – Сейсенбі күні Израильдің Ливандағы әуе шабуылынан қаза тапқандар саны 22 адамға жетті, тағы 80-і жарақат алды. Бұл туралы сәрсенбіде Ливанның денсаулық сақтау министрлігі мәлімдеді, деп хабарлайды Синьхуа ақпарат агенттігі. 

Ведомствода нақтылағандай, елдің әртүрлі провинциясында қаза болғандар мен жарақат алғандар тіркелген. 2023 жылдың 8 қазанында Израиль мен «Хезболла» арасындағы қақтығыс басталғалы бері құрбан болғандардың жалпы саны 2 141 адамға жетіп, 10 099-ы жарақат алған.

Ливан премьер-министрі Наджиб Микати сәрсенбі күні мәлімдегеніндей, араб елдері мен халықаралық қауымдастық Израильдің Ливандағы агрессиясын тоқтату үшін күш салуды жалғастыруда. Бұл ретте ол ілгерілеуге Израильдің ымырасыздығы кедергі болып отырғанын атап өтті. 

«Ливанның араб елдері және басқа мемлекеттердегі достары атысты тоқтатуға қол жеткізу үшін қысым көрсетуді жалғастыруда және қажетті саяси қадамдарды талқылап жатыр. Олардың ең маңыздысы – Израильдің БҰҰ Қауіпсіздік Кеңесінің 1701 қарарын толық орындауы», - деп атап өтті Микати. 

23 қыркүйектен бері Израиль қарулы күштері «Хезболламен» қақтығыстың күшеюі жағдайында Ливанда «Солтүстіктің жебелері» аталған ауқымды әуе операциясын жүргізуде. 

2023 жылдың 8 қазанынан бастап «Хезболла» мен Израиль армиясы Ливан-Израиль шекарасында соққы алмасып келеді. Бұл Газа секторында ХАМАС пен Израиль арасында жалғасып жатқан шайқастарды ескере отырып, қақтығыстың өршу мүмкіндігіне қатысты алаңдаушылық тудырып отыр.