Jibek Joly туристік пойызы Түркістанға келді
АСТАНА. KAZINFORM – Туризм индустриясы комитетінің төрағасы Нұртас Кәріпбаев Түркістан облысына жасаған сапары барысында Jibek Joly туристік пойызымен алғашқы сапарға шыққан саяхатшыларды қарсы алды. Бұл туралы Туризм және спорт министрлігі хабарлады.
Туризмді дамыту мен мәдени алмасу мақсатында қолға алынған жаңа маршрут 115 саяхатшыны қабылдады. Алғашқы рейстің жолаушылары Түркістанда бір күн, Өзбекстан астанасы Ташкентте екі күн өткізеді. Туристерге ыңғайлы болу үшін кәсіби гидтермен экскурсия ұйымдастырылып, жайлы автобустар ұсынылды.
Jibek Joly туристік пойызы Мемлекет басшысы Қасым-Жомарт Тоқаевтың тапсырмасымен, туризмді дамыту стратегиясы аясында іске асырылғанын атап өткен жөн. Жоба жаңа бағыттарды ашуға, екі ел арасындағы мәдени байланыстарды нығайтуға және азаматтар үшін саяхаттың қолжетімділігін арттыруға бағытталған.
Еске сала кетейік, бұған дейін Алматы станциясынан Jibek Joly туристік пойызы сапарын бастағанын хабарлаған едік.