К.Мәсімов Білім министріне Ақтөбеде ҰБТ-ның дұрыс өтуін бақылауға алуды тапсырды
15:57, 06 Маусым 2016
АСТАНА. ҚазАқпарат - Бұл Үкіметтің селекторлық режімдегі отырысында ҚР Премьер-Министрі Кәрім Мәсімов білім және ғылым министрі Ерлан Сағадиевке Ақтөбеде ұлттық бірыңғай тестілеудің дұрыс өтуін бақылауға алуды тапсырды.
«Кеше кешкісін балалардың қауіпсіздігі үшін екі пункттегі Ұлттық бірыңғай тестілеуді өткізу мерзімін 7 маусымға ауыстыру туралы шешім қабылданды. Ата-аналар мен ұстаздарға қажетті мәліметтер берілді. Барлық пункттерде ҰБТ штаттық режімде жүргізілу үстінде. Егер сіздің тарабыңыздан тапсырма болатын болса, онда мен Ақтөбеге өзім барып, жағдайды бақылауға аламын», - деді министр ҚР Премьер-Министрі Кәрім Мәсімовке қарата.
«Барыңыз, жиналыстан кейін ұшып кетіңіз. Облыс әкімімен бірлесіп, бұл мәселені бақылауға алыңыз»,- деді Үкімет басшысы.