Қ.Саудабаевтың Норвегиядағы кездесулерінде ядролық қауіп-қатерді таратпау мәселесіне айрықша көңіл бөлінді

АСТАНА. 6 наурыз. ҚазАқпарат - Норвегияға сапары аясында ҚР Президенті жанындағы Жаппай қырып-жою қаруын таратпау мәселелері жөніндегі комиссияның төрағасы, «Назарбаев орталығының» директоры Қанат Саудабаев ядролық қаруды таратпау мен қарусыздандыру саласындағы норвегиялық және халықаралық саясаткерлерлермен, сарапшылармен бірқатар екіжақты кездесулер өткізді.

Қ. Саудабаев Норвегия Стортингінің (Парламентінің) вице-президенті Марит Нюбак, «Парламентарийлер ядролық қаруды таратпау және қарусыздандыру үшін» (ПЯНР) халықаралық ұйымының жаһандық үйлестірушісі Алын Варэ, сондай-ақ танымал американ әртісі, ядролық қарусыздандыру үшін қозғалысының белсендісі Мартин Шинмен жүздесті.

Тараптар Қазақстан мен Норвегия ынтымақтастығының, әсіресе, екіжақты қарым-қатынасты тікелей байланыстыратын мәселелердің бірі ядролық қауіп-қатерді қысқарту мен таратпау саласына айрықша көңіл бөле отырып, жай-күйі мен келешегін талқылады.

«Мен Қазақстанға ядролық қарусыздандыру ісіндегі жүйелі үлесі үшін айрықша құрмет білдіремін», - деп атап көрсетті М.Нюбак.

Осы сапар барысында Ядролық қарусыз әлемнің Жалпыға ортақ декларациясы және «АТОМ» Жобасы сияқты Қазақстан Президентінің халықаралық бастамаларын ары қарай алға бастыру жоспарлары талқыланды.