Медаль Францияның мемлекеттік наградасы болып табылады. Бұл медальдің тарихы бар. Аталған қауымдастық халықаралық бизнеспен байланыс орнату үшін кезінде Наполеон Бонапарттың жарлығымен құрылыпты. Ал 1868 жылы қауымдастықтың Үлкен алтын медалі үздіктерді марапаттау үшін тағайындалған екен. Содан бері бұл жоғары наградамен француздың және шетелдердің кәсіпкерлері, ғалымдары, өнер қайраткерлері марапатталады. Наградаға үміткерлікке қойылатын басты талап: жоғары кәсіби біліктілік және саладағы жаңашылдық. 1998 жылдан бастап бұл наградаға дамушы елдер де қол жеткізе бастапты.
Жәзит Кәрімұлы еліміз нарыққа көшкен жылдары бұрынғы шаруашылықты агрофирма етіп қайта құрып, өндірісті жаңаша ұйымдастырудың үлгісін көрсеткен болатын. Еліміздегі алғашқы фермердің шаруашылығы қанат жайды, соған сәйкес тұрғындардың, ауыл еңбеккерлерінің әлеуметтік жағдайы да жақсарды. 1996 жылы оның бастамасын Елбасы Нұрсұлтан Назарбаевтың өзі қолдап, озық тәжірибе өріс алған еді. 2000 жылы Жәзит Кәрімұлы Қазақстанның «Жыл адамы» атанды. Еліміздің өзге марапаттарынан да кенде болған жоқ.
- Париждегі марапаттау қауымдастықтың үлкен сарайында өтті. Содан кейін Франция парламентінің сенаторлары қабылдады, кешкісін салтанат Наполеон сарайында жалғасты, -дейді Жәзит Кәрімұлы.
Ж.Құдайқұл - Қостанайда Францияның жоғары наградасына ие болған екінші адам. Біріншісі - А.Байтұрсынов атындағы Қостанай мемлекеттік университетінің бұрынғы ректоры, ғалым-металлург, бүгінгі сенатор Хұсайын Валеев болатын, деп жазады «Егемен Қазақстан» газеті.