Қала құрылысы кадастрының деректерін цифрландыруға қомақты қаражат бөлінуде

АСТАНА. ҚазАқпарат - Қала құрылысы кадастрының деректерін цифрландыруға өңірлер бөлетін қаражат көлемі белгілі болды. Оны бүгін Үкімет отырысында мемлекеттік қала құрылысы кадастрын цифрлау жөнінде баяндаған ҚР Инвестициялар және даму министрі Жеңіс Қасымбек жария етті, деп хабарлайды ҚазАқпарат. 

«Өңірлер қала құрылысы кадастрының қолда бар ақпараттық ресурстарын ұсыну, сондай-ақ инженерлік желілер мен коммуникацияларды түгендеуге қаражат бөлу жұмыстарын бастады. Бүгінде Көкшетау, Ақтөбе, Атырау қалаларының және Алматы облысының Талдықорған қаласы мен 8 аудан орталықтарының деректері берілді. Қарағанды облысы Қарағанды қаласының деректерін берді. Батыс Қазақстан облысы материалдар беруге дайындалуда және үш жыл ішінде 1 аудан орталығының аумағын түгендеуге 225 млн теңге бөледі»,- деді министр.

Оның айтуынша, ағымдағы жылы Жамбыл облысы бойынша 191 млн теңге және кейінгі 3 жылға облыс аумақтарын түгендеу үшін 725 млн теңге қарастырылып отыр. Ал Қостанай облысы ағымдағы жылы түгендеуге 100 млн теңге және келесі жылға 252 млн теңге бөлуді жоспарлаған.

«Қызылорда облысы бойынша барлық қолда бар деректер толығымен берілді. Маңғыстау облысы Ақтау, Жаңаөзен қалаларының және 2 аудан орталығының деректерін берді, басқа аудандарды түгендеуге қаражат бөлетін болады. Павлодар облысы Павлодар қаласы бойынша ішінара деректер берді, келесі жылы түгендеуге 77 млн теңге бөлу жоспарланып отыр», - деді Жеңіс Қасымбек.

Министрдің сөзіне қарағанда, Солтүстік Қазақстан облысы Петропавл қаласы бойынша ішінара деректер беріп, ағымдағы жылы түгендеуге 143 млн теңге, келесі жылға 149 млн теңге бөлмек. Шығыс Қазақстан облысы Өскемен қаласының және облыстық маңызы бар 2 қала мен 10 аудан орталығының деректерін, Оңтүстік Қазақстан облысы Шымкент қаласының ішінара деректерін берді. Астана және Алматы қалалары бойынша деректер берілмеді.

Бүгінгі күнде қала құрылысы кадастрының бірыңғай жүйесін қалыптастыру аясында бірқатар жұмыстар атқарылды. Экономиканың негізгі бағыттары бойынша 35 мыңнан астам нысан қамтылған 9 тақырыптық қордан тұратын қала құрылысы кадастрының республикалық деңгейі құрылып, жүргізілуде. Жоғарыда айтылғандай, қала құрылысы кадастрының облыстық, аудандық және базалық деңгейлері Қызылорда облысында қалыптастырылған. Аталған өңірде 5 жыл ішінде бір де екі мың масштабты кадастрдың цифрлық деректеріне жергілікті бюджеттен 700 миллион теңгеге жуық қаражат бөлінді»,- деді министр.

Фото: juddfire.com