Қант диабетімен есепте тұрғандарға инсулиннің 22 түрі сатып алынды
«2018 жылы қант диабеті бойынша диспансерлік есепте тұрған қазақстандықтар үшін инсулиннің 22 түрі сатып алынды. Бұдан басқа, осындай диагнозы бар балалар үшін мемлекет инсулин помпаларын және оған шығыс материалдарын сатып алып отыр. 2018 жылдың алғашқы үш айында бүкіл ел бойынша медициналық ұйымдарға 1,5 млрд теңгеге препараттар жөнелтілді. Сондай-ақ тегін медициналық көмектің кепілдік берілген көлемі аясында қазақстандықтар үшін 500 млн теңгеге глюкометрлер мен тест-жолақтары жеткізілген», - деп атап өтілген ҚР Денсаулық сақтау министрлігі мәліметінде.
Қазіргі кезде қант диабетін емдеуге арналған препараттар көбіне Алматыға (169 млн теңге сомасына) , ШҚО-ға (168 млн теңгеге), Қарағанды облысына (156 млн теңгеге) және Алматы облысына (137 млн теңгеге) келіп түсті.
«Қант диабетіне шалдыққан адамдарды қамтамасыз ету тұрғысында мемлекетпен осындай диагнозы бар қазақстандықтарды емдеу үшін көзделген барлық препараттар сатып алынды. Олардың барлығы Бірыңғай дистрибьютордың қоймаларында бар және медициналық мекемелердің өздері мәлімдеген көлемде медициналық ұйымдарға жеткізіліп жатыр. Қазірге дейін наурыз айы үшін медициналық ұйымдарға тегін препараттарды тарату аяқталып қалды», - делінген министрліктің хабарламасында.