Қаңтарда ұрланған 142 қару-жарақ ерікті түрде тапсырылды -ІІМ
«Прокуратура мен ішкі істер органдары өкілдерінің түсіндіру жұмыстарының нәтижесінде, бүгінде 142 қару-жарақ ерікті түрде тапсырылды. Бұл ретте, ұрланған қаруды табу мен тәркілеу бойынша жедел-профилактикалық және іздестіру іс-шаралары жалғасып келеді. Қазіргі кезде еліміздің полицейлері 1480 қару мен 35 мыңнан астам оқ-дәріні тапты», - деді С. Әділов орталық коммуникациялар қызметінде.
Онңы айтуынша, биыл 6 қаңтарда жаппай тәртіпсіздіктер барысында Алматы қаласы Рысқұлов көшесіндегі «Охотник KZ» қару-жарақ дүкенінен жұмыс істемейтін жергілікті тұрғын екі ойық ұңғылы мылтық пен 7,62 мм калибрлі патрондарды ұрлаған.
Ұрланған қару мен патрондар тәркіленіп, күдікті соттың санкциясымен қамауға алынды.
«Биыл 21 сәуірде Тараз қаласында жедел-іздестіру іс-шаралары барысында полиция қызметкерлері жергілікті тұрғынды ұстады. Одан 6 қаңтарда Жамбыл облысы полиция департаментінің ғимаратынан ұрланған 9 мм калибрлі патрондары бар Макаров тапаншасы тәркіленді. Ол күдікті де соттың санкциясымен қамауға алынды», - деді Тергеу департаментінің басшысы.
Бұдан бұрын хабарланғандай, қаңтар оқиғасы кезінде 1 502 бизнес нысаны тоналды.