Қапшағай полицейлері аязды күні далада жатқан адамды құтқарып қалды
Қапшағай қаласы полиция бөлімінің қызметкерлері түнгі мезгілде әкімшілік аумақты автопатрульдеу кезінде саяжайларға баратын жолда қозғалыссыз жатқан адамды байқаған.
Жедел қасына келгенда оның мас екені және денесінде үсік шалу белгілері байқалған.
«Саяжайларға баратын жолдағы көпірдің астында жатқан адамның сұлбасын байқап қалдық. Дала қатты аяз еді. Жатқан адамның қолынан үсік шалу белгілерін көріп, бірден сол жерге жедел жәрдем шақырдық. Дәрігерлер тұрғынды ауруханаға алып кетті»,- дейді №258 экипаждың мүшесі, полиция кіші лейтенанты Әділбек Жүнісханов.
43 жастағы тұрғын Қапшағай қаласының жергілікті ауруханаға жеткізілген.
Оған алкогольдік масаңдық және дененің қатты мұздауы диагнозы қойылған.
Бірнеше сағаттан кейін тұрғын емделу үшін үйіне жіберілген.
Өз кезегінде полицейлер қысқы мезгілде балалар мен масаң күйдегі адамдарды далаға бақылаусыз жіберудің қауіпті екенін ескертеді.
Әлеуметтік желі арқылы қала тұрғындарына үндеу тастаған полицейлер осыған ұқсас қандай да бір жағдайға куә болса, жедел түрде 102 нәміріне немесе өзге де арнайы қызметтерге хабар беруін сұрайды.