Қар 4 облыста нормадан артық түскен
АСТАНА. KAZINFORM – Экология және табиғи ресурстар министрлігі Kazinform сауалына жолдаған жауапта қар қалың түсіп жатқан өңірлерді атады.
- «Қазгидромет» РМК бақылау бекеттерінің 2025 жылғы 10 қаңтардағы мәліметтері бойынша 2024-2025 жылғы суық кезеңде, яғни қарлы кезеңде жиналған ылғал қоры (төмендегі кестеде көрсетілгендей) республиканың шығыс (ШҚО, Абай облыстары), орталық (Ақмола облысы) және оңтүстік (Түркістан облысы) өңірлерінде нормадан 16-дан 38%-ға дейін жоғары болып қалыптасты, - деп жазылған жауапта.
Ал Алматы, Жетісу, Қарағанды, Павлодар, Солтүстік-Қазақстан облыстарында түскен қардың көлемі осы мерзімдік нормаға сай көрінеді. Ақтөбе, Атырау, Батыс Қазақстан, Қостанай және Ұлытау облыстарында жауған қардың көлемі мерзімдік нормадан төмен.
Бұған дейін хабарлағанымыздай, алдағы үш күнде республика бойынша температураның одан әрі төмендеуі болжанды. Кей өңірде 40 градусқа дейінгі қатты аяз қысуы мүмкін.