Өңірде құқық бұзушыларға қатысты жаңа шектеулер де қарастырылып жатыр. Атап айтқанда, алкоголь өнімдеріне акциз мөлшерін арттыру, сондай-ақ құқықбұзушылықтар жиі тіркелетін дүкендер мен көңіл көтеру орындары үшін арнайы антирейтинг енгізу ұсынылып отыр.
Қарағанды облысында «Ішімдіксіз ауыл» жобасы аясында 74 ауыл алкогольден толықтай бас тартқан.
Полицияның мәліметінше, бұл бастама айтарлықтай әлеуметтік нәтиже берген. Аталған елді мекендерде тұрмыстық жанжалдар мен спирттік ішімдік тұтынуға байланысты қылмыстар тіркелмеген.
Облыстық полиция департаментінің бастығы Нығмет Исмағұловтың айтуынша, оң өзгерістер жобаны өңір бойынша әрі қарай кеңейтуге негіз болған.
— Бұл ауылдарда отбасылық-тұрмыстық жанжалдар мен алкоголь тұтынуға байланысты қылмыстар тіркелмейді. Сондықтан жобаны одан әрі ауқымды түрде жалғастыру ұсынылады, - деді департамент басшысы.
Құқық қорғау органдарының мәліметінше, қазіргі таңда тұрмыстық зорлық-зомбылықтың, қоғамдық тәртіпті бұзудың және алкоголь өнімдерін заңсыз сатудың алдын алуға ерекше көңіл бөлініп отыр.
Билік өкілдері ішімдіктен бас тарту тек қылмыс деңгейін төмендетіп қана қоймай, ауылдардағы жалпы қоғамдық ахуалды жақсартуға да ықпал етеді деп санайды.
Сонымен қатар мемлекеттік деңгейде алкоголь нарығын реттеуге қатысты қосымша шаралар талқыланып жатыр. Ұсыныстар қатарында спирттік өнімдерге салынатын акциздерді көтеру, сауда орындарын бақылауды күшейту және кәсіпкерлерге қойылатын талаптарды қатаңдату бар.
Әсіресе қоғамдық тәртіп жиі бұзылатын аула дүкендері мен ойын-сауық орындары ерекше бақылауға алынуы мүмкін. Мұндай нысандар үшін арнайы антирейтинг енгізу ұсынылып отыр. Жүйелі түрде тіркелетін құқықбұзушылықтар сауда орындарының әрі қарай жұмыс істеуіне және беделіне әсер етуі ықтимал.
Полиция өкілдері мұндай бастамалардың басты мақсаты негізсіз тыйым салу емес, тұрғындар үшін қауіпсіз орта қалыптастыру және мас күйінде жасалатын қылмыстар санын азайту екенін атап өтті.
Осыған дейін Қызылорда облысында ішімдіксіз ауылдар саны 37-ге жеткенін хабарлаған болатынбыз.