Аталған дерек бойынша құқық қорғау органдары сотқа дейінгі тергеуді бастады. Алдын ала мәліметке сәйкес, ғимараттың сыртқы қаптамасындағы кірпіш құлап, оқиға орнында болған бүлдіршінің басына тиген. Оқиға сәті түсірілген бейне әлеуметтік желілерде таралып, жұртшылықтың алаңдаушылығын арттырды.
Қарағанды облысы Полиция департаментінің мәліметінше, іс Қазақстан қылмыстық кодексінің «Қауіпсіздік талаптарына сай келмейтін тауарларды шығару немесе сату, жұмыстарды орындау не қызметтер көрсету» бабымен тіркелді.
– Әлеуметтік желілерде тараған бейнематериал негізінде, Бұқар жырау ауданында болған оқиға бойынша қылмыстық іс қозғалды, - деп хабарлады ведомствоның баспасөз қызметі.
Зардап шеккен бала жедел түрде медициналық мекемеге жеткізілген. Қазіргі уақытта ол дәрігерлердің тұрақты бақылауында.
– Балаға қажетті барлық медициналық көмек көрсетіліп жатыр, - деп нақтылады полиция өкілдері.
Оқиға орнында жедел-тергеу тобы жұмыс істеп жатыр. Мамандар болған жайттың барлық мән-жайын жан-жақты әрі объективті анықтауға бағытталған тергеу әрекеттерін жүргізіп жатыр. Бұқар жырау ауданы әкімдігі де жағдайға қатысты ресми ұстанымын білдіріп, болған оқиғаның алаңдаушылық туғызғанын атап өтті.
– Мәдениет үйі ғимараты маңында болған бұл жағдайды үлкен алаңдаушылықпен қабылдадық, - делінген әкімдік хабарламасында.
Жергілікті атқарушы органның мәліметінше, балаға толық көлемде медициналық көмек көрсетіліп жатыр және оның жағдайы дәрігерлердің қатаң бақылауында. Сонымен қатар әкімдік зардап шеккен баланың отбасымен тұрақты байланыс орнатып, қажетті қолдау көрсетілетінін жеткізді.
Айта кетейік, 2022 жылы аталған Мәдениет үйінде ағымдағы жөндеу жұмыстары жүргізілген. Енді тергеу аясында орындалған жұмыстардың сапасы мен қауіпсіздік талаптарына сәйкестігі, сондай-ақ болған жағдайға жауапты тұлғалар анықталмақ.
Еске салайық, бұған дейін Астанада тұрғын үй кешендерінің бірінде қаптама мен кондиционердің құлауынан зардап шеккен жедел жәрдем фельдшері ауруханада көз жұмған болатын.