Қарағандылықтар жарықсыз қалды: Облыс әкімі мәлімдеме жасады

28 қыркүйек күні Қарағанды қаласының басым бөлігі жарықсыз қалды. Осыған байланысты өңір әкімі Ермағанбет Бөлекбаев облыс тұрғындарына видеоүндеу жасады, деп хабарлайды ҚазАқпарат. 

Облыс басшысының айтуынша, бүгін таңертең Қарағанды қаласының ЖЭО-3 станциясында және Топар ГРЭС-2-де штаттан тыс жағдай орын алды.

«Қазіргі сәтте Топар ГРЭС-2 жүктемені көтеріп жатыр және менің тапсырмаммен бірінші орынбасарым Вадим Басин болған жағдайды анықтау үшін станцияға аттанып кетті. Жүктемені көтеру және өңір тұтынушыларына электр жарығын қысқа мерзімде беру үшін KEGOC-пен және барлық станциялармен барлық шаралар қолға алынып жатыр», - деді Ермағанбет Бөлекбаев.

Бұған дейін Қарағанды қаласы әкімдігінің баспасөз қызметі қорғаныс тетігінің іске қосылуынан ЖЭО-3-те технологиялық ақау туындап, салдарынан 220 кВ-тық Ашық тарату құрылғысы тоқтап қалғанын мәлім еткен еді.

Еске салсақ, кеше Қарағандыда тағы бір төтенше оқиға туындап, бірнеше көше нөсер жауын суының астында қалған болатын.