Қарағанды облыстық қан орталығы донорларға зәру
«Бізге барлық түрдегі қан донорлары қажет. Донорлар 18 жастан асқан, медициналық қарсы көрсетілімі жоқ адамдар бола алады. Ол дегеніміз жүректің, бүйректің, бауырдың созылмалы ауруы болмауы керек, бір органы жоқ болса ол адам донор бола алмайды. Бұрын жұқпалы ауруы болған, мысалы гепатит, АИТВ, мерез, туберкулезбен ауырғандар да жарамайды. Донордың салмағы 55 келіден асуы керек. Қан тапсырғаны үшін ақшалай төлем мөлшері 0,25 АЕК (730 теңге). Донорға екі күн демалыс беріледі», – дейді Облыстық қан орталығы директорының орынбасары Ләззат Сабырова.
Сондай-ақ, қан орталығы иммундық плазманың донорына мұқтаж. COVID-19 таралуына байланысты аймақтың медициналық мекемелерінің иммундық плазмаға деген қажеттілігі артты. Ол коронавирус инфекциясы бар науқастарды емдеу үшін өте қажет.
«Ол үшін соңғы 4-5 айда орташа және ауыр коронавирусты жұқтырған 18 жастан асқан (жүктілігі жоқ) әйелдер мен ерлер иммундық плазма доноры бола алады. Иммундық плазманың доноры болғысы келетіндер жексенбіден басқа күндері күн сайын сағат 08: 00-16: 00 аралығында бізге хабарласуы керек. Біз алдымен донорлық тексеруді, консультацияны өткізіп, антидене деңгейін анықтаймыз. Тексеріс тегін жүргізіледі. Егер антидене деңгейі жақсы болса, онда біз донорға ыңғайлы уақытты тағайындаймыз және оны процедураға күтеміз. 600 мл иммундық плазма үшін ақшалай төлемнің мөлшері – 22 275 теңге», – деді Ләззат Сабырова.
Сондай-ақ, антидененің қажетті деңгейі бар, COVID-19-қа қарсы вакцинацияланған облыс тұрғындары иммундық плазмаға қан тапсыра алады.
Қан орталығына келген кезде жеке куәліктің түпнұсқасы болуы керек. Плазмаға қан тапсыру процедурасы кем дегенде екі сағатқа созылады.
Тұрғындар мына мекен-жайда антидене титрін анықтап, қан тапсыруына болады: Қарағанды қаласы Кеншілер даңғылы 81-үй.
Анықтама телефондары: 50-30-33 (тіркеу), 50-79-09 (ішкі нөмір: 207, 250), 50-68-66.