Қарағанды облысы биыл БАӘ-ге 1 мың бас қой экспорттады

АСТАНА. ҚазАқпарат - Қарағанды облысы биыл Біріккен Араб Әмірліктеріне 1 мың бас қой экспорттады. Бұл туралы бүгін Астанада Орталық коммуникациялар қызметінде өткен брифингте Қарағанды облысы әкімінің ауыл шаруашылық бойынша орынбасары Шагурашид Мамалинов мәлім етті, деп хабарлайды ҚазАқпарат.

«Жаңаарқа ауданының «Жеңіс» асылтұқымды мал зауыты» ЖШС Біріккен Араб Әмірліктерінің азық-түлік тауарларын импорттайтын жетекші компаниясымен 10 мың бас қойды жеткізу туралы келісімшартқа қол қойған. Қазіргі уақытта БАӘ-ге алғашқы 1 мың бас қой экспортталды. Экспортқа қажетті мал басын қамтамасыз ету үшін ауыл шаруашылық кооперативтері жұмылдырылады», - деді Мамалинов.

Оның сөзінше, тағы 1200 бас қойды өзге елге жөнелту жоспарлануда. Әкім орынбасарының мәліметтері бойынша, облыста 1,1 млн. бас қой бар.

«Жылқы саны бізде 275 мың бас. Жылдық өсім 4-5 пайызды құрайды. Облыста шағын шаруа қожалықтары мен өзіндік қосалқы шаруашылықтарды ауыл шаруашылық өндірістік кооперативтеріне біріктіру жұмыстары жүргізілуде», - деп атап өтті ол.

Жалпы, Қарағанды облысында агроөнеркәсіптік кешен саласында 49 млрд. теңгеге 62 инновациялық жоба қолға алынуда. Қаржылық қолдау қоры арқылы 37 млн. теңгеге 17 мал бордақылау алаңы салынған.