Қарағанды облысында ерлі-зайыптылар Сирияға бет алған

ҚАРАҒАНДЫ. ҚазАқпарат - Қарағанды облысы Сәтбаев қаласында ДАИШ (ИМ) лаңкестік ұйымы қатарына қосылуды жоспарлаған ерлі-зайыпты сотталды. Бұл туралы ҚазАқпарат тілшісі облыстық прокуратураның баспасөз қызметіне сілтеме жасап хабарлады.

«Емізулі баласы бар ерлі-зайыпты наурыз айында Қазақстанның мемлекеттік шекарасын кесіп өтті. Бішкек қаласына жеткен ер мен әйел Түркия арқылы Сирияға жетуді жоспарлаған. Отағасы қарулы жиһадқа қатысу үшін ДАИШ (ИМ) лаңкестік ұйымы қатарына қосылғысы келген», - делінген хабарламада.

Аталған факті бойынша Сәтбаев қалалық соты үкім шығарды. Ерлі-зайыптыны лаңкестік топ қызметіне қатысуға оқталғаны үшін және Қазақстанның мемлекеттік шекарасынан заңсыз өткені үшін айыптады. Ер адам 6 жылға бас бостандығынан айырылды. Ал емізулі баланың анасы 6 ай мерзімге шартты жазамен құтылды.

Прокуратураның мәліметтері бойынша, Сәтбаевта қаласында лаңкестікті насихаттағаны үшін бір жылда екі адам жауапқа тартылды. Оның бірі 6 жыл, 5 айға қамалса, екіншісі 5 жыл абақтыда жазасын өтейтін болады. Екі сотталушы да әлеуметтік желілерде экстремизмді таратқан.