«Кездесу барысында Спасск мемориалдық кешені аумағында Испанияның естелік белгісін орнату туралы мәселе талқыланды. Бар деректерге сәйкес Карлагта өз уақытында шамамен испандық 150 әскери тұтқын болған. Олардың 11-і қаза тапқан», - делінген хабарламада.
Н.Әбдібеков қазірде ескерткіш белгі орны айқындалып, оны орнату жұмыстары басталып кеткенін хабарлады. Кездесу барысында сауда-экономикалық ынтымақтастық мәселелері талқыланды. «Облыстың сыртқы сауда айналымы 2014 жылғы қаңтар-шілдеде 4,3 млрд. доллардан асты, бұл ретте Испаниямен сыртқы сауда айналымы 8,2 млн. долларды құрады. Бұл өзара тиімді іскерлік әріптестікті одан әрі дамытуда ауқымды пайдаланылмаған мүмкіндіктер бар екендігін көрсетеді», - деп атап өтті өңір басшысы. Облыс әкімі испандық бизнесмендерді экономиканың әр саласында ынтымақтасуға шақырды. Спасск мемориалдық кешені әскери тұтқындар жерленген орында салынған. Спасск кентінде 1930-50 жылдары КСРО ІІМ - ІІХК бөлімшесі, әскери тұтқындар мен шетелден жер аударылған азаматтар лагері болған. Мұрағат деректеріне сүйенсек, Сапасск зиратына 50-ден астам ұлттың 5000-нан астам әскери тұтқындары жерленген. Ол жерге әр мемлекеттен 30-ға жуық естелік белгі орнатылған. 2004 жылы қарағандылық билік орындарының бастамасымен Қазақстан жерінде жерленген барлық саяси қуғын-сүргін құрбандарына арнап ескерткіш орнатылды.