Қарағанды облысында көктемгі аңшылық маусымы қашан басталады

ҚАРАҒАНДЫ. ҚазАқпарат – 2-16 сәуір аралығында Қарағанды облысының оңтүстік бөлігінде, атап айтқанда Жаңаарқа, Шет, Ұлытау және Ақтоғай аудандарында аң аулау маусымы күшінде болады. Ал Осакаров, Бұқар жырау, Нұра, Қарқаралы және Абай аудандарында аңшылық 16 сәуірде басталып, 30 сәуірде аяқталады, деп хабарлайды ҚазАқпарат тілшісі.

Аңшылардың жануарлар дүниесін пайдалануға рұқсаты, аңшы куәлігі, аңшылық шаруашылығы субъектісінің жолдамасы болуы қажет.

Атыс қаруымен аң аулау кезінде азаматтық қару мен оның патрондарын сақтауға және алып жүруге рұқсат құжаты болуы шарт.

«Аң аулау бекітілген мерзімдер мен жанурлардың түрлеріне сәйкес қатаң белгіленген жерлерде ғана болады. Бұл ретте фауна өкілдерінің сирек кездесетін және жойылып бара жатқан түрлерінің тіршілік ету ортасын сақтау және жақсарту үшін жануарлар әлеміне ұқыпты қарау қажет. Сондай-ақ, атыс қаруын қолданған кезде қауіпсіздік ережелерін сақтау керек», - деп мәлімдеді Қарағанды облысының бабиғи ресурстар және табиғат пайдалануды реттеу басқармасы.

Рұқсат құжаттары болмаған, аң аулау ережелері сақталмаған, сондай-ақ жануарлардың сирек түрлерін аулау кезіндегі аңшылардың іс-әрекеттері браконьерлік болып бағаланады, бұл үшін құқық бұзушыларға жауапкершілік жүктеледі.