Қарағанды облысындағы күн электр стансасының құрылысына қаржы бөлінді

Бүгін ҚР Президенті жанындағы Шетелдік инвесторлар кеңесінің 31-ші отырысы аясында тиісті келісімшартқа қол қойылды. Қаржыландыруға жасыл климат қоры мен таза технологиялар қоры қатысып отыр. Заемның жалпы көлемі - 31,1 млн доллар, деп хабарлайды ҚазАқпарат тілшісі.

Қарыздың басым бөлігі - 22 миллион долларды банк берсе, жасыл климат қоры - 4,2 миллион доллар, ал жасыл технологиялар қоры 5,8 миллион доллар бөліп отыр. Аталған ұйымдар Қазақстандағы күн электр стансасының құрылысын алғаш рет қаржыландырмақшы. Ал жоба құрылысы мен эксплуатациясымен қытайлық «Risen Energy» компаниясы айналысады. Аталған компания Қытайда күн батареяларын өндіру саласындағы жетекші ұжымдардың бірі болып саналады. Жаңа электр стансасының арқасында ауаға шығарылатын СО2-нің көлемін 55 000 тоннаға азайтуға болады.

ҚР Энергетика министрі Қанат Бозымбаевтың айтуынша, осы саладағы әріптестік байланыстар жалғаса береді.

«Біз қазіргі жобалармен шектелмейміз. Оған қоса, бізде халықаралық аукциондар кезіндегі жеңімпаздар анықталды. Олар Қазақстанда күн және жел электр стансаларын салатын болады. Жасыл энергетиканы дамыту тұжырымдамасына сәйкес, 2020 жылға дейін баламалы энергетиканың үлесі 3 процентке дейін жетуі керек. Ал 2030 жылда аталған көрсеткіш 10 процентке көтерілуі шарт. Сол себепті біз Еуропаның қайта құру және даму банкі сияқты қаржы иснституттарымен жұмыс істеуіміз керек», - деп атап көрсетті Қ.Бозымбаев.

Айта кетейік, Қарағанды облысындағы күн электр стансалары үш жерде орналасады. Жақында бір жобаның құрылысы Балқаш қаласына жақын Гүлшат ауылында басталды. Бұдан бөлек, Ағадыр мен Саран қаласында тағы екі станса салынады.